ALIYEKUWA MKURUGENZI IGUNGA AFIKISHWA MAHAKAMANI NA WENZAKE 10
Tarehe: 08 Nov, 2023
Aliyekuwa Mkurugenzi wa Halmashauri ya Wilaya ya Igunga Mkoani Tabora Athumani Msabila na watumishi kumi wa Umma, wamefikishwa katika Mahakama ya Wilaya ya Kigoma na kusomewa Mashtaka mbalimbali ikiwemo uhujumu uchumi.
Washitakiwa hao wamesomewa Mashtaka hayo mnamo Novemba 7, 2023 na wakili Mwandamizi wa Serikali Anasisye Erasto mbele ya Hakimu Mkazi wa Mahakama hiyo Hassan Momba.
Akisoma Hati ya Mashtaka wakili Anasisye amesema washtakiwa hao wanakabiliwa na makosa 11 waliyoyatenda nyakati mbalimba katika Mkoa wa Kigoma na Dodoma ikiwemo kuisababishia Serikali hasara, kugushi nyaraka za serikali, matumizi mabaya ya ofisi pamoja na kukiuka haki na maslahi ya Jamhuri ya Muungano wa Tanzania.
Aidha washtakiwa hao hawakutakiwa kujibu mashtaka yao na wamerudishwa rumande mpaka kesi inayowahusu itakapotajwa tena.
